Padayon ang aton programa nga Kamalayan, isa ka libre nga legal clinic kag forum, sa Barangay Our Lady of Lourdes, Jaro.
Ginbuksan ang programa sang mensahe ni Kagawad Austien Aligarbes para sa barangay. Aton man ginpaathag ang katuyuan sang Kamalayan: respetuhon ang aton kinamatarong kag protektahan ang kinamatarong sang iban.
Si Atty. Jonnie Dabuco, Regional Director sang Commission on Human Rights Region 6, ang nagpahanumdom man sang pagkilala sang aton tawhanon nga kinamatarong.
Ginpaathag ni Atty. Peter Jason Millare, Department Head sang Iloilo City Local Housing Office (ICLHO), ang mga programa sang ila opisina, lakip ang PASILONG housing program. Ginsabat man niya ang pila ka mga palamangkutanon sang komunidad parte sa housing programs kag iban pa nga mga requirements para maka avail sini.
Si Ms. Rosa Mmae “Bubbles” Aquit, OIC District Head sang Jaro 1 sang City Social Welfare and Development Office (CSWDO), ang nagpakilala sang mga serbisyo sosyal nga bukas sa tanan nga sektor, ilabi na sa mga kabataan, mga babayi, senior citizens, solo parents, kag sa mga nagakinaganglan.
Sa open forum, may mga palamangkutanon parte sa pag-avail sang pension sang senior citizens kag sa pagkay-o sang birth certificate. May pila man ka kaso nga ginhambal nga pribado kaupod ang aton mga abogado.
Sa amo man nga kahigayunan, aton ginhatagan sang ila uniporme ang pulo ka tanod sang barangay.
Madamo nga salamat kay Punong Barangay Leo Lindero, kay Barangay Secretary Cristina Luntao, mga opisyales, kag mga pumuluyo sang Barangay Our Lady of Lourdes. Salamat man sa aton mga partner sa sini nga programa — Atty. Andres Panes, Director sang USA College of Law – Clinical Legal Education Program (CLEP); Atty. Jonnie Dabuco sang CHR; Atty. Peter Jason Millare sang ICLHO; kag Ms. Rosa Mmae “Bubbles” Aquit sang CSWDO.
Padayon naton nga itib-ong ang tawhanon nga kinamatarong sang tagsa ka Ilonggo!
Ang Brgy. Our Lady of Lourdes MALAYA at may MALAY, may KAMALAYAN.